Pimmusay ti maysa a padi idiay Ecuador kalpasan a natupakan daytoy iti dakkel a krus a natnag manipud iti dingding ti simbaan kabayata iti gimong idiay Guayaquil, Ecuador.
Nabigbig ti nasao a padi ti Archdiocese of Guayaquil a ni Fr. Patricitio Alfredo Sanchez Molinari nga agserserbi iti Church of Perpetual Relief idiay Central Vicariate.
Sigun iti report, napasamak ti insidente idi Sabado, Oktober 17 bayat a maipatpatungpal ti gimong a nakalivestream iti social media.
Makita iti video ti pannakatnag ti dakkel a krus manipud iti likod ti altar ken panagtupak daytoy iti ulo ni Sanchez bayat iti misa.
Kabayatanna, iti statement ti Archdiocese of Guayaquil, inyebkasda ti pannakipagladingitda iti pamilya, gagayem, ken komunidad a pagserserbian ti padi.
