Binalakadan ti Air Defense Command ti Philippine Air Force (PAF) dagiti umili iti asideg ti Clark Air Base iti panagadu ti jet flying operations kadagiti sumaganad nga aldaw gapu iti Exercise Cope Thunder 2025.
Iti facebook post ti Philippine Air Force (PAF), kinunana a dagiti aktibidad ket paset ti naurnos a panagsanay a mangpasayaat iti interoperability, readiness, ken air combat capabilities.
Idi laeng kalman, inrugi ti PAF ken ti United States Pacific Air Forces (PACAF) ti military exercise iti Clark Air Base sadiay Mabalacat City, Pampanga.
Manipod Abril 7 agingga 18, mangisayangkat ti panagsanay ti Cope Thunder Philippines 2025 iti Basa Air Base and Clark Air Base idiay Pampanga ken iti Colonel Ernesto Ravina Air Base idiay Tarlac.
Mangideploy ti nasao nga ahensia ti 729 personnel ken nagduduma a kita ti aircraft para iti panagsanay.
Kabayatanna, mangipatulod met ti United States Pacific Air Forces (PACAF) iti pakabuklan a 250 personnel ken F-16 fighter jets.
