Inwaragawag ni Baguio City Councilor Betty Lourdes Tabanda, mangidadaulo iti Social Services, Women & Urban Poor iti Baguio City Council a maiyuswat inton Oktobre 21 ti PAG-AYWANAN Center iti siudad ti Baguio.
Iti pannakiuman ti Bombo Radyo kenkuana, impeksana nga aramidenda kas PAG-AYWANAN Center ti mannarimaan a Senior Center idiay Salud Mitra.
Inlawlawagna a manipud iti mismo a nagan, manamnama nga agbalin daytoy a lugar a pagay-wanan kadagiti senior citizens iti siudad.
Sigun kenni Councilor Tabanda, agserbi ti nasao a center kas pagturongan dagiti senior citizen nu kasdiay a kayatda nga agaliwaksay, agay-ayam, wenno nu kayatda laeng nga apan makisarsarita kadagiti padada a senior citizens.
Adda met dagiti agbantay a social workers sadiay ken inyebkasna a mannarimaan ti panagbirokda kadagiti volunteers a senior citizens a naayat a tumulong ken mangaywan kadagiti pada da a seniors.
Malaksid iti dayta, maidiaydiaya metlaeng dagiti nagduduma a serbisyo kadagiti senior citizens iti siudad.
Inton Oktobre 19, maaddaan metlaeng iti Palarong Pinoy para kadagiti seniors tapno maikanda met iti gundaway a babaen kadagiti nagduduma nga ay-ayam .
Idauloan met daytoy ti Federation of Barangay Association of Senior Citizen Associations (FBASCA).
Maipatungpal met inton Oktobre 21 iti Chorale and Dance Competition kadagiti nagduduma a Barangay Senior Citizen Associations.
Binalakadan met ni Councilor Tabanda dagiti senior citizens iti siudad a panpanunotenda a saan a maliklikan ti bumaket ken lumakay ngem napateg a maaddaanda iti nasayaat a panggep iti biyag.//kcs//
