![](https://img.bomboradyo.com/baguio/2021/12/baguio-city-1.png)
BAGUIO CITY – Naipaulog ti Executive Order No. 160-2021 a nakailanadan dagiti pagalagadan iti panakaipasidong ti Baguio City iti Alert Level 2, nangrugi idi kalman, December 1.
Maibilbilin latta ti panagaramat ti face shield kadagiti naririsgo a lugar kas kadagiti health facilities wenno establishimento a mangkidkidaw iti daytoy.
Mangrugi met iti alas-dos ti parbangon agingga iti alas-dies ti agsapa ti implementasyon ti liqour ban bayat maipatungpal ti general curfew kadagiti laeng lugar a nangatngato ti quarantine status dagitoy.
Mapalubosan met ti 80% nga on-site capacity kadagiti pribado ken parapubliko a pagtraboahan; 50% ti seating capacity kadagiti dine-in establishments ken para laeng kadagiti fully vaccinated nga indbibidual bayat nga 70% ti outdoor capacity.
Maipalpalubos ti 50% venue capacity ken para laeng kadagiti fully vaccinated ti operasyon dagiti fitness centers, spa, museums, tourist ken leisure attractions pakairaman pay ti religous gatherins bayat a 70% iti outdoor venues dagitoy.
Amin met nga establishimento ket mabalin a nayonanda iti 10% ti operating capacity dagitoy no naipaayandan ti Safety Seal Certificate ken nasken nga ipasigurado dagitoy a dagiti asymptomatic a fully vaccinated ti mapalubosan kadagiti indoor/enclosed spaces.
Nainget a naibilin a saan pay a mapalubosan ti operasyon dagiti bars, night clubs ken liqour establsihments iti sidong ti Alert Level 2.
Amin met a drivers dagiti parapasahero a jeep ken taxi ket nasken a fully vaccinated bayat a nasken nga agpasidong iti RT-PCR test wenno antigen test tunggal dua a lawas iti bukodda a gastos dagiti saan a nabakunaan.
Naibilin pay kadagiti addaan pakaseknan ti salun-at iti panangiparangda ti medical certificate manipod iti City Health Services Office ngem nasken latta nga agpasidongda iti COVID-19 testing tunggal quarter.
Dumanon met iti 70% ti maximum capacity dagiti parapasahero a jeep bayat a tallo laeng ti pasahero dagiti taxi.