BAGUIO CITY – Manamnama a mairuar ita nga aldaw ti guidelines seknan iti panagawat ti Baguio City kadagiti leisure travel request.
Iti interview ti Bombo Radyo Baguio, kinuna ni City Administrator Engr. Bonifacio Dela Pena nga ag-epektibo ti baro a pagadalan inton Enero 6 agingga Enero 18 kas paset ti panaggannad ti siudad iti pangta ti COVID-19 ken ti variant daytoy.
Inyunay-unayna a saan nga isardeng ti Baguio City nga agawat ti turista ngem temporario laeng a masuspendir iti agdama gaputa nakompleton ti 5,000 a bilang a rumbeng laeng nga akomodaren ti siudad agingga inton Enero 8.
Inlawlawagna a dagiti nagrequest ti travel leisure iti Baguio VISITA sakbay ti Enero 2 ket mapalubosan latta a sumrek ditoy siudad kas maibasar iti naaprubaran a petsa.
Impettengna a dagiti nagaplikar iti Baguio VISITA manipud enero 2 ket saan pailaeng a mapatgan a sumrek ditoy siudad agingga nga awan pailaeng ti pinal a pagalagadan a naipaulog.
Karaman kadagiti baro a pagalagadan nga ipatungpal ti Baguio City ket ti panangikalikagumda ti negatibo a resulta ti RT-PCR test wenno Antigen Test malaksid iti vaccination card dagiti bisita nga agtaud iti Alert Level 3 partikular ti Metro Manila.
Saan met a maikalikagum ti negatibo a covid-19 testing kadagiti bisita nga agtaud kadagiti lugar a naipasidong iti Alert level 2 kas ti Pangasinan, Tarlac ken daduma pay.
