BAGUIO CITY – Impetteng ti City Social Welfare And Development Office (CSWDO) a dagiti laeng kangrunaan nga agkasapulan ti maipaayan iti family food packs kagiddan ti enhanced community quarantine.
Iti interbyu ti Bombo Radyo Baguio kenni CSWDO head Betty Fangasan, kinunana a nakitaripnong dagitoy kadagiti stakeholders ken opisial dagiti barangay tapno mabigbig no asino dagiti maibilang a kakukurapayan a residente.
Dinakamatna a masapul a mapili a naimbag dagiti maipaayan iti family food packs gapu ta saan a kabaelan ti opisina a maipaayan iti tulong ti amin a residente.
Kinuna a puntiria ti opisina a maipaayan iti family food packs ti agarup 20,000 a household iti siudad.
Kinunana a ti family food packs a maipaay ket agpaut iti dua aginggat tallo nga aldaw para iti pamilia nga addaan iti innem a miembro.
Innayon ni Fangasan a no maipaayen ti family food pack ket maysa laeng a kameng ti pamilia ti mabalin nga apan mangala iti daytoy iti barangay hall wenno saan ket i-deliver daytoy dagiti boluntario.
