BAGUIO CITY – Impaulogen ti City Treasury Office ti Baguio dagiti pagalagadan seknan iti panakailako dagiti sabong ken kandela iti deppaar ti Jadewell Parking Area sadiay Burnham Park para inton November 1 ken 2.
Sigun kenni City Treasurer Alex Cabarrubias, mangrugi ti aplikasyon para iti special permit inton October 16 agingga 19 bayat a mangrugi ti panagilako iti nasao a disso inton October 26 agingga November 1.
Dinakamatna a tapnu mapalubusan nga agilako dagiti maseknan ket nasken nga agbayadda ti P1,188 iti City Treasury.
Inlawlawagna a ti babayadan ket bukbuklen ti business tax, mayor’s permit, garbage fee, sewerage fee, electric bill ken kas abang ti disso iti uneg ti makalawas.
Innayonna a dagiti agaplikar ket nasken nga adda iti legal nga edad, residente ti Baguio ken awanan ti penalty wenno panaglabsing iti pagalagadan sadiay idi napalabas a tawen.
Maala ti application form manipud iti Campaign and Investigation Division ti City Treasury bayat a nasken a mangisumitir ti 2×2 picture, barangay business clearance, cedula, garbage fee ken photocopy ti aniaman a valid ID.
Maipasdek ti 15 nga stalls para kadagiti agilaklako ti kandela ken 22 nga stalls para kadagiti agilaklako ti potted flowers bayat a 99 nga stalls para kadagiti agilaklako ti cut-flowers.
