Opisyalen nga indeklara ti Philippine Atmospheric, Geophysical and Astronomical Services Administration (PAGASA) ti panagrugi ti rainy season iti pagilian a Pilipinas.
Iti pannakiuman ti Bombo Radyo kenni Engr. Larry Esperanza, Chief Meteorologist ti Philippine Atmospheric, Geophysical and Astronomical Services Administration (PAGASA)-Baguio, kinunana a dagiti criteria para iti pannakaideklara ti rainy season ket ti masansan a panagtudo, ti panagdalapos ni bagyong Aghon ken ti panagraira ti habagat.
Dinakamat ni Esperanza nga adda ti maysa agingga dua a bagyo a sumrek iti pagilian inton Hunyo.
Dinakamatna pay a 69% ti posibilidad a mapasaran ti La Niña iti bulan ti Hunyo agingga Agosto ita a tawen.
Nupay kasta, inlawlawag ni Esperanza a paturong pailaeng ti panawen iti “neutral” nu sadino saan pay a dagus a marikna ti panawen ti El Niño wenno La Niña.
Dumandanon iti 19 agingga 20 a bagyo ti kadawyan a sumsumrek iti pagilian tunggal tawen ngem idi napalabas a tawen ket agarup sangapulo laeng a bagyo ti sinumrek iti pagilian ngem napipigsa ti intensity dagitoy.
Gapu iti daytoy, binallaagan ni Esperanza ti publiko ken dagiti nagduduma nga opisina nga agsagana tapno ammo ti aramiden nu dumteng ti bagyo.
