Inwaragawag ti Philippine Institute of Volcanology and Seismology (PHIVOLCS) a mabalin a makapasar ti napigpigsa iti magnitude 8 a ginggined ti pagilian a Pilipinas.
Sigun kenni Teresito Bacolcol, Director ti Philippine Institute of Volcanology and Seismology (PHIVOLVCS), mabalin a makapasar iti magnitude 8.1 a mangitund ti tsunami nga agingga iti 10 meters iti Philippine Trench idiay Samar bayat a mabalin a mangitunda ti Manila Trench iti magnitude 8.3 a ginggined.
Gapu iti dayta, binallakadan ti nasao nga opisyal dagiti residente iti asideg ti baybay a dagus nga agbakwit, apaman a mapaliiwda ti kellat a panagbaba ti lebel ti danum iti igid ti baybay.
Kasaruno daytoy ti napasamak a magnitude 7.2 a ginggined idiay Taiwan a nakadadaelan dagiti pasdek ken nakatayan ti sangapulo nga idibidual.
