Pagdandanagan ita ni President Ferdinand Marcos Jr. ken dadduma pay a maseknan nga indibidual ken ahensia, ti inreport ti Program for International Student Assessment (PISA) a nabigbig ti pagilian a Pilipinas kas bullying capital iti sangalubungan.
Iti press conference sadiay Malacañang, kinuna ni Second Congressional Commission on Education (EdCom 2) Executive Director Karol Mark Yee a malaksid iti bullying, kaunaan ti pagilian iti “loneliness”.
Maibasar iti panagadal, marikna dagiti estudiante a Pilipino a saanda a “belong”, isu’t gapuna a makariknada iti ladingit.
Kabayatanna, kinuna ni Secretary Sonny Angara a nainget ti panangmonitor ti Department of Education, kadagiti pagadalan no umno ti pannakaipatungpal ti linteg kontra-bullying.
Immunan nga inadmitir ni Angara a sumagmamano laeng a pagadalan ti addaan iti bukodda nga anti-bullying policy, isu’t gapuna a nasken a mamonitor ti pannakaipatungpal dagiti nasao a polisiya.
