BAGUIO CITY – Iyap-apela manen dagiti stakeholders ti vegetable industry ti panangimplementar ti lokal a gobyerno ti La Trinidad, Benguet iti paglintegan para iti panagala iti akreditasyon dagiti buyers ti nateng a gumatgatang kadagiti trading centers iti nasao a munisipyo.
Iti interview ti Bombo Radyo Baguio kenni Agot Balanoy, panakabagi ti liga dagiti asosasyon iti La Trinidad Vegetable Trading Post, inlawlawagna a napintas ita a panawen para iti implementasyon ti nasao a paglintegan gaputa bassiten dagiti vegetable buyers nga agturturong sadiay.
Kinunana a bayat a saan a naipasa ti lokal a konseho ti maisaksakad a Revised Trading Post Code ket nasayaat no un-unaenda nga ikalikagum ti panagala iti akreditasyon manipud iti lokal a gobyerno dagiti nasao a buyers.
Inyunay-unayna a ti lokal a gobyerno ti addaan bileg a mangited iti akreditasyon dagiti buyers ti nateng tapnu masalwadan met ti interes dagiti mannalon ken disposers.
Dinakamatna nga iti report dagiti mannalon ken disposers kadakuada ket adun dagiti buyers a saan a nakabaybayad iti inala dagitoy a nateng ken idi napalabas a lawas ket dumanonen iti P40-M ti gatad ti utang dagiti buyers kadagiti mannalon ken disposers iti La Trinidad Vegetable Trading Post.
