Impakaamo ti Visitors Information Center, Baguio City a ti kangrunaan a damag a maaw-awatda manipod kadagiti bisita iti siudad ti Baguio ket ti pagparadaan ti lugan.
Sigun kenni Jethro Carantes, maysa a Department of Tourism (DOT) accredited tour guide, damdamagen dagiti bisita ti dadduma pay a mabalin a pagparadaan ti lugan iti kanito a napunno ti parking area iti aglawlaw ti Burnham Park wenno iti dadduma a naituding a parking area.
Kas sungbat, insuhesionna nga aglikaw laengen dagitoy iti siudad ti Baguio wenno agbisita iti dadduma a pagpasyaran bayat nga ur-urayenda a mabakante-an ti naituding a parking area.
Sigun kenkuana, nabayagen a pakaseknan ti pagparadaan ti lugan iti Baguio City nangruna iti long weekends wenno holidays.
Patienna nga ad-adda pay nga ummadu ti lugan iti masungad a yulitide season.
Gapu iti dayta, kidkiddawenna iti lokal a gobierno iti siudad ti Baguio ti pannakaipasdek ti multi level parking area tapno ad-adu ti maakomodar a lugan dagiti bisita a sumang-at iti City of Pines.
Maipalagip nga idi napalabas a tawen, pangpanggepen ti LGU-Baguio City a mangipasdek ti multi level parking area, ngem agingga iti agdama ket awan paylaeng.
Kabayatanna, kaaduan a bumisbisita iti opisina ti Visitors Information Center ket nagtaud pay manipod Metro Manila, Batangas, Ilocos Region, ken dagiti nagtaud iti ballasiw-taaw.
Inyunay-unayna kadagiti bumisbisita iti siudad a suruten dagiti linteg kasta met ti pakdaar ken obserbaranna latta ti kinadalus ti aglawlaw.
