BAGUIO CITY – Naminsan manen a rinebbek dagiti operatiba ti PDEA-Cordillera ti pagtaengan ti maysa a drug lord ditoy siudad ti Baguio tapnu iserbi ti bench warrant daytoy.
Napasamak ti operasyon kalpasan a kinanselar ti korte ti bail bond wenno piansa ti drug lord a ni Federico Oliveros.
Idi laeng kalman ket impila dagiti abogado ti PDEA-Cordillera ti mosyon a mangkidkiddaw iti panangkanselar ti korte iti piansa ni Oliveros.
Daytoy ket kalpasan a napatgan ti impila ti abogado ni Oliveros a petisyon tapnu makapiansa ti drug lord.
Sigun iti PDEA-Cordillera, ti kaso ni Oliveros ket non-bailable gapu iti kalidad ti iligal a droga a nakumpiskar iti ikotna iti inserbi dagiti operatiba ti ahensia a search warrant idi July 14 ti agdama a tawen kas maitunos iti RA 9165 wenno iti Comprehensive Dangerous Drugs Act of 2002.
Maibasar iti rekord ti PDEA, ni Oliveros ti dadaulo ti notorious nga Oliveros Drug Cartel nga addaan operasyon ditoy Baguio City, no sadino, iti kaudian nga operasyon kontra kenkuana ket nakumpiskar iti pagtaenganna sadiay Carlos Heights, Irisan ti P340,000 a gatad ti iligal a droga, pakairamanan ti liquified form ti methamphetamine ken nagduduma a drug paraphernalia malaksid pay iti paltog ken nagduduma a bala.
Kagiddan iti daytoy, inkari ti PDEA-Cordillera ti panagbantayda kadagiti kaso a maipilpila kadagiti makemkemmeg a drug personalities iti masakupan ti rehion.
