BAGUIO CITY – Imimbestigaran dagiti otoridad ti pakabigbigan dagiti suspek a nangtakaw iti maysa a pawnshop a nakapukawan iti nasarurok P1.6-M a gatad ti alahas sadiay Baguio City Public Market itay laeng nabiit.
Maibasar iti blotter ti pulisya, nakaawat iti reklamo ti pawnshop manipod iti maysa a maseknan nga indibidual a mapukpukaw ti insaldana nga alahas daytoy.
Gapu iti daytoy, imbaon ti management ti pawnshop ti toada a mangisayangkat iti surprise inventory kadagiti tagilako ken naisalda kadakuada nga alahas pakairamanan dagiti nakasagana a mai-auction.
Maibasar iti resulta ti inventory, dumanon iti P1, 640, 900 ti gatad ti naisalda nga alahas ti natakaw malaksid pay iti P17,700 nga alahas a naitudong a mai-auction.
Iti pakabuklan, dumanon iti P1, 658, 600 ti balor dagiti natakaw nga alahas, ken cash nga dumanon iti P68,000.
Iti inisyal nga imbestigasyon ti pulisya, awan ti nakitada nga aniaman a pagilasinan a puwersado a sinerrek dagiti saan pay a nabigbig a suspek ti pawnshop.
Naduktalanda met a saan nga agkurkuri ti CCTV camera ti establishemiento kasta met a ti naimuntar iti vault room ket naisango iti diding.
Malaksid iti daytoyawan ti kuryente idi napasamak ti krimen rason a saan a nagkurri ti alarm.
Nasarakan met iti abay ti vault ti maysa a ragadi ti landok.
Atapen dagiti otoridad a kas nga inside job robbery ti napasamak.
Mainaig iti daytoy, maminsan manen nga agpalpalagip dagiti otoridad a kitaenda a naimbag no dagiti imunmuntarda nga CCTV cameras ket uman-andar wenno agkurkuri tapnu makatulong daytoy a mang-monitor nu adda dagiti kapadama a pasamak wenno insidente.
