BAGUIO CITY–Pormal nga inabrasa ti Philippine Military Academy (PMA) ti grupo a buklen ti PMA Class of 2024 babaen iti naangay nga Incorporation Rites ti akademya sadiay Borromeo Field, Fort General Gregorio del Pilar, Baguio City idi kalman.
Pakabuklan a 350 a kadete ti karaman iti PMA Class of 2014 no sadino 280 kadagitoy ti lallaki ken 70 a babbai.
Indauluan ni Superintendent ken Vice Admiral Allan Ferdinand Cusi ti programa bayat a kangrunaan a sangaili ni AFP Chief of Staff General Felimon Santos.
Ti Incorporation Rites dagiti kabarbaro a kadete ti pormal a panakairamanda iti Corps Armed Forces of the Philippines.
Kabayatan ti seremonya, naaramid ti Testimonial Parade and Review para kenni General Santos kas pammigbig iti nasurok 38 a tawen daytoy iti serbisyo.
Imbinglayna iti mensahena ti panangiyunay-unayna kadagiti baro a kadete a mangibati iti napintas a lagip iti akademya.
Pinalagipana met dagiti upper class a kadete iti nalinteg a panangidauloda kadagiti plebo ken ti panagtalinaed ti ispirito ti Honor Code iti akademya.
Dinayaw met ni Superintendent Cusi dagiti 4th class cadets ken ti training directorate dagitoy gapu iti balligi a panakaipasada iti
New Cadet Battalion Training iti baet dagiti karit nga intunda ti mapaspasaran a COVID-19 pandemic.
