BAGUIO CITY – Nakumpiskar ti pakabuklan a 87 a kilo dagiti frozen nga imported meat a mailaklako iti Dagupan Public Market sadiay Tabuk City, Kalinga idi kanikadua babaen kadagiti miembro ti Local Price Control Council sadiay.
Sigun kenni Dr. Clemencia Cagan manipud iti Tabuk City Veterinary Services Office, kinumpiskarda dagiti nasao a nagduduma a produkto a karne gapu iti panakapaay dagiti vendors a mangiparang ti kaskenan a dokumento kas iti Meat Inspection Certificate kabayatan ti panag-inspeksion dagitoy.
Naipaima met dagiti nakumpiskar a karne iti maseknan nga opisina para iti umno a disposisyon dagitoy.
Naisayangkat ti panaginspeksion kas paset ti nairtengan a kampanya ti Tabuk City kontra iti panakaiserrek sadiay dagiti saan a naidokumento a karne ken produkto a karne kas panagliklik iti panagwaras ti African Swine Fever sadiay Kalinga.
