BAGUIO CITY–Dumanon iti 66,000 a pinuon ti marijuana nga aggatad iti P13.2-M ti nauram ken nadadael kabayatan ti dua nga aldaw nga eradication ti nagduduma nga operatiba sadiay Barangay Loccong, Tinglayan, Kalinga idi napalabas a lawas.
Maibasar iti report, nangisayangkat dagiti nagtipon a pwersa dagiti otoridad iti OPLAN 09 Juliet Lagpot idi Sabado ken idi kalman no sadino naduktalanda ti agarup 6,000 a pinuon ti marijuana a naimula iti agarop 1,500 a metro kwadrado a lote ken aggatad iti P1.2-M.
Kabayatana, nadadael ken nauram metlaeng iti kapadana nga aldaw ti agarup P12-M a gatad ti 60,000 a pinuon ti marijuana a naimula iti mapatta-patta a 3,000 a metro kwadrado a lote.
Ti dua nga aldaw nga operasyon dagiti otoridad sadiay Barangay Loccong, Tinglayan, Kalinga ket nagresulta iti panakadadael ken panakauram ti pakabuklan a 66,000 a pinuon ti marijuana ken aggatad iti pakabuklan a P13.2-M manipud iti pakabuklan a 4, 400 a metro kwadrado a lote a nakaimulaad dagiti iligal a droga.
Awan latta ti nadanunan wenno natilwan dagiti otoridad nga indibidual kabayatan ti operasyon.
