Naragsak nga inawaragawag ni Budget Secretary Amenah F. Pangandaman nga iti umuna pay laeng a bulan iti agdama a tawen ket impalusposen ti departamanetona a Department of Budget and Management ti pakabuklan a P49.80 bilyon pesos a badyet para iti pension dagiti indigent senior citizens.
Sigun kenni Pangandaman, daytoy ket agarup doble a badyet no idilig iti P25 bilyon pisos nga alokasyon kadagiti kallabes a tawen.
Inlawlawag ni Pangandaman, nga iti sidong ti administrasyon Marcos, agbalinen a doble ti binulan a pensiyon dagiti marigrigat a seniors .
Agbalin ita daytoy a sangaribu tunggal bulan manipud iti sigud a lima gasut a pisos tunggal bulan.
Sigun kenni Pangandaman, mapatta-patta a nasurok iti uppat a milyon ti bilang dagiti indigent senior citizens a makaawat iti social pension.
Kinuna ti opisyal a dakkel a tulong daytoy kadagiti natataengan para iti inaldaw a pagkasapulanda.
Innayon ni pangandaman a babaen iti daytoy ket maalay-ayan ti panagbisin dagiti natataengan ken maipanamnama a saanda a mabaybay-an wenno maab-abuso no di ket maipapaay ti pagkasapulan dagitoy.//AP
