BAGUIO CITY – Dumanonen iti 24 ti Patient Under Investigation (PUIs) iti para iti posibilidad ti Coronavirus Disease – 2019 wenno COVID-19 ditoy rehiyon Cordillera.
Maibasar daytoy iti kaudian a datus ti Department of Health – Cordillera manipud iti umuna nga aldaw a nagmonitor ken naglista dagitoy kadagiti PUIs agingga idi kalman, February 16.
Kinuna ni Dr. Amelita Pangilinan, DOH-Cordillera Regional Director a manipud iti 24 a PUIs ket 10 ti nakaruar iti pagagasan bayat a 14 ti agtaltalinaed a maipaspasidong iti quarantine.
Innayonna a manipud iti 14 nga adda iti quarantine ket 4 ti adda iti ospital bayat a 10 ti adda iti pagtaenganda ngem nainget a mabambantayan.
Sigun pay kenkuana, manipud iti 24 a PUIs ket 17 ti nagnegatibo bayat a dagiti dadduma ket maur-uray paylaeng ti resulta ti panaka-adal ti sample dagitoy.
Dinakamat ni Dr. Pangilinan a nakitaan dagiti PUIs iti sintomas ti uyek, panateng, nagatel ken nasakit a karabukob ken gurigor nupay saan a nakaro dagitoy.
Kabayatanna, dumanon metten iti 66 ti Patients Under Monitoring wenno dagiti addaan ti pakasaritaan ti panagbiahe iti ballasiw taaw wenno close contact kadagiti PUIs ngem awanan met iti sintomas.
Innayonna a manipud iti 66 a PUMs, 26 kadagitoy ti nakalpasen iti 14-day quarantine bayat a dagiti dadduma ket manarimaan a naka-home quarantine.
