BAGUIO CITY – Impeksa dagiti small scale miners ken ti pamilya dagitoy sadiay Itogon, Benguet dagiti reklamo ken pakaseknanda mainiag iti maipatpatungpal nga Oplan Itogon wenno mining ban.
Maibasar kadagiti reklamo a maaw-awat ti official FB page ti Bombo Radyo Baguio, impeksa dagiti residente ti kiddaw ken apela dagitoy a maipaayanda pay iti kanayonan a gundaway wenno pawayway tapnu maiprosesoda dagiti gold ores wenno naba a saanda pay a naiproseso ngem nairuardan manipud iti pagminasan sakbay pay ti Bagyo nga Ompong.
Sigun kadakuada, nasken laeng a maipaayanda iti kanayonan a panawen tapnu maiproseso wenno maigilingda dagiti naba tapnu adda ti mailakoda ken adda ti aramatenda iti panagadal dagiti annakda ken iti innaldaw a pagkasapulan iti pagtaenganda bayat a maipaspasidongda kadagiti livelihood programs.
Impettengda a ti rumbeng a bantayan dagiti pulis ken dagiti soldado ket dagiti abot dagiti pagminasan tapnu saan a makastrek dagiti minero.
Imbingayda a gapu iti makabulan a habagat ken iti simmaruno a bagyo ket saanda a nakapagtrabaho ken nakaiproseso ti naba isut gapuna nga awan ti urnong wenno pondo a panggastosda kadagiti pagkasapulanda ita.
Kinunada nga agtungtungpalda iti stoppage order isut gapuna a maiparbeng met a siguraduen ti gobyerno nga amin dagiti apektado a minero ket maipaayan ti kaskenan a tulong.
Agamak met dagiti estudyante nga annak dagiti minero gapu iti posibilidad nga awan wenno agkurang ti pinansiyal a para iti panagadalda.
Sigun met kadagiti dadduma a sari-sari stores, saan a makabayad dagiti minero kadagiti utang dagitoy gapu iti panakaisardeng ti pagbiagan dagitoy.
Babbabalawen pay dagiti pamilya dagiti minero ti panag-imet dagiti soldado iti de-kalibre a paltog nangruna ta saanda met a terorista ngem ketdi, biktima ti napalabas a kalamidad.