![](https://img.bomboradyo.com/baguio/2021/07/nutrition-month.jpg)
BAGUIO CITY – Puntirya ti National Nutrition Council (NNC) – Cordillera a mapaka-ammuan ti publiko iti kinapateg ti nutrisyon kadagiti ubbing kagiddan ti selebrasion ti maika-47 a National Nutrition Month ita a bulan ti Hulyo nga addaan ti tema a “Malnutrisyon Patuloy na Labanan, First 1000 Days Tutukan.”
Sigun kenni Bella Basalong, OIC Regional Nutrition Program Coordinator ti NNC-Cordillera, 4.5% kadagiti ubbing iti rehion ti underweight wenno kurang iti timbang no idilig iti tawen dagitoy bayat a 33.4% dagiti stunted wenno natiltil nga ubbing.
Maibasar iti survey, maikalima ti Cordillera kadagiti rehion iti pagilian a nakailista ti kaaduan nga ubbing nga overweight, no sadino 3.1 percent a nangatngato no idilig iti national level.
Inlawlawagna a dakkel ti risgo a makaptan iti sakit a kanser ken kapada a komplikasion iti salun-at dagiti ubbing a nakaro a nalulukmeg.
Sigun met kenni Candice Salingbay, Nutrionist-Dietician IV ti Department of Health-Cordillera, napateg unay ti umuna a 1,000 nga aldaw ti ubing manipud iti panagsikog ti ina agingga iti maikadua a panagkasangay daytoy.
Inyunay-unayna a daytoy ket ‘golden window of opportunity’ gaputa napateg ti health and nutrition ken development ti maysa nga ina ken ti anak daytoy. (with Bombo Razced Pagoli)