BAGUIO CITY – Binagbagaan manen ni Mayor Mauricio Domogan dagiti kakaduana nga opisyales para iti saan dagitoy a panangilaok iti maris pulitika kabayatan dagiti kangrunaan nga aktibidad ti Panagbenga inton Sabado ken Dominggo.
Sigun kenkuana, nasken a liklikan dagiti opisyales ti siudad nga agkampanya kabayatan dagiti nasao a panawen.
Inyunay-unayna nga iti parada ket saan a mabalin nga agpaigid dagiti opisyales tapnu makisao kadagiti tattao nga agbuybuya.
Dinakamatna pay a saan a mabalin nga aglugan kadagiti floats dagiti pulitiko a nakasuot iti t-shirt wenno kalugong nga agmaris iti pakabigbigan ti grupo dagitoy wenno naglaon iti ladawan ti rupa dagitoy.
Innayonna a maipawil ti panangipurwak kadagiti agbuybuya kadagiti banag a naglaon iti pakabigbigan ti maseknan a pulitiko.
Kabayatanna, naamuan a sumagmamano kadagiti personalidad nga aglugan kadagiti floats ket ti agkabsat a Bongbong ken Imee Marcos malaksid pay kadagiti dadduma a kongresista.
Naituding nga agserbi a kangrunaan a sangaili inton Sabado ni Political Adviser Francis Tolentino bayat nga inton Dominggo ket agserbi a kangrunaan a sangaili ni Department of Tourism Secretary Wanda Teo.
