Nagun-od ti delegasyon ti Cordillera Administrative Region(CAR) ti maika-sangapulo ket tallo a pwesto iti overall standing daytoy iti kalleppas a Palarong Pambansa 2024 idiay Cebu City.
Pakabuklan a tallo pulo ket pito(37) ti naiyawid dagitoy a medalya, kaadwan ket bronze a dumanun iti sangapulo ket walo(18), sarunwen ti gold medal a dumanun iti onse(11), ken silver a walo(8).
Immuna metten nga impakita ti delegasyon ti Cordillera ti panagyamanda iti host region ken iti billeting school iti impaay dagitoy a suporta para iti naballigi a panakipartisipar ti nasao a delegasyon iti pasalip babaen iti naangay a “Panagyaman Program” idiay Mabolo Elementary School.
Kabaytanna, opisyalen a nagleppas ti Palarong Pambansa idi kalman nu sadino, naangay ti seremonya iti Cebu City Sports Center a pinasetan met ni outgoing Department of Education(DepEd) Secretary Sara Duterte.//Bombo Rob Dominguez
