BAGUIO CITY- Naobserbaran iti pimmintas a pamastrekan dagiti Pony Boys iti Wright Park manipod idi napalabas a bulan ti Marso kagiddan ti pannakaipasidong ti Baguio City iti Alert Level 1.
Iiti pannakiyuman ti Bombo Radyo Baguio ken Arnel Cayatoc, mangidadaulo ti Pony Boys Association, kinunana a nagsublin ti sigud a birukda ken dakkel ti nagbaliwan ti bingayda manipod pay nangrugi iti selebrasyon ti Panagbenga Festival.
Kinunana a manipod iti maysa agingga dua a paabangda iti kabalyo ket dumanonen iti tallo agingga uppat a daras iti panangpaabang dagitoy.
Kagiddan iti dayta, inpanamnamana ti nainget latta a pannakasurot dagiti minimum public health standards kontra iti COVID-19.
Mainaig iti dayta, mangnamnama dagitoy iti agtultuloy a panagsangbay dagiti turista tapnu agtultuloy ti panangsubbotda iti nagbalin a pukaw dagitoy kabayatan iti agdama a pandemya.
Saan met a maliklikan a mapasaran iti nailet a taray iti trapiko paturung iti nasao a parke.
Nupay kasta, adda ti presensya ti pulisya a mangiwanwanawan para iti pannakapalukay daytoy.
