![](https://img.bomboradyo.com/baguio/2020/01/PO2-Walner-F.-Danao.jpg)
BAGUIO CITY – Naklaat ken napasaktan ti pamilya ti maysa kadagiti SAF44 iti damag nga imbasura ti Sandiganbayan dagiti naipila a kaso kontra kadagiti sigud a high-ranking police officials a nangidaulo iti kontrobersial nga Oplan Exodus a nagresulta iti Mamasapano Massacre iti sidong ti administrasyon ni sigud a Presidente Benigno Aquino III idi January 25, 2015, sumagmamano nga aldaw sakbay ti maikalima a tawen nga anibersaryo ti masaker.
Partikular nga imbasura ti Sandiganbayan dagiti kaso a graft ken usurpation of authority a sangsangwen da sigud a PNP-SAF chief Getulio Napeñas ken sigud a PNP chief Alan Purisima gapu iti kinakurang ti probable cause.
Iti interview ti Bombo Radyo, naklaat ken napasaktan ti pamilya daydi PO3 Walner Danao idi naamuanda ti nasao a desisyon ti Sandiganbayan nangruna ta saan daytoy a naipaka-ammo kadakuada ken naamuanda laeng babaen iti Bombo Radyo.
Gapu iti daytoy, saan pay a nakaipaay iti komento ti pamilya ni PO3 Danao manipud Baguio City.
Nupay kasta, kinuna ni Mrs. Julie Danao, ina ti pimmusay nga elite trooper a hustisya ladta ti kiddaw ti pamilyada ken dagiti pamilya dagiti dadduma pay a SAF44 para kadagiti napasag a commandos gapu iti nakaam-ames a panakamasaket dagitoy.
Innayonna nga agapelada manen kenni Presidente Rodrigo Duterte para iti panakaragpat ti matartarigagayan a hustisya nangruna ta iti immuna a panagtaripnongda kenni Presidente Duterte ket impeksa daytoy ti suportana iti nasao a tarigagayda.
Kabayatanna, maangay ti assembly dagiti nagannak dagiti 15 a Cordilleran warriors iti SAF44 sadiay Camp John Hay, Baguio City inton bigat, January 23.
Kalpasanna, agturong dagitoy sadiay Metro Manila inton Biyernes, January 24 tapnu makitaripnong iti abogado dagiti pamilya ti SAF44.