BAGUIO CITY – Hustisya ti ipukpukaw ita ti pamilya ti practice teacher a pinapatay dagiti saan pay a nabigbig a suspek sadiay Bangued, Abra.
Ti biktima ket agtawen iti duapulo ket tallo, estudyante ti Abra State Institute of Science and Technology, tubo ti Naglibacan, Tineg, Abra ken agab-abang iti maysa a boarding house sadiay Bangbangar, Bangued.
Maibasar iti iggem ni Tineg Vice Mayor Edwin Crisologo a kopya ti autopsy report, nakumpirmar a narames ti biktima sakbay a napapatay.
Naamuan pay a kinagkagat ti koton ti bagi ti biktima, maisungani iti atap ti pamilyana a nasinit iti sigarilyo ti nagduduma a paset ti bagi daytoy.
Kinuna ni Crisologo a maibasar iti report kadakuada, ti naudi a kadwa ti biktima sakbay ti insidente ket ti nobyona a ni Ian Tingday a boluntaryo a simmango kadagiti otoridad tapnu madalusan ti naganna.
Immunan a nasarakan ti bangkay ti balasang iti karuruotan a paset ti Barangay San Antonio, Bangued nga addaan iti dua a tama ti paltog iti ulo daytoy.
