Agladladingit ti pamilya ti pimmusay nga 18-anyos college student a ni Clint Lloyd Diwas manipud La Trinidad, Benguet kalpasan a naaksidente dagitoy idiay Dawel bridge idiay Dagupan City idi Agosto dise nuebe.
Sigun kenni Patrolman Mark Oliver Sagun Torio, manipud Dagupan Police Station, kinunana nga imanmaneho ti biktima ti maysa a motorsiklo, angkasna ti 18-anyos a da Jerwin Abod Ngaseo kenni Lorilyn Villanueva, agpada a taga Baguio City.
Kinuna ni Torio, a napasamak ti aksidente gapu ta saan a nakita ti biktima ti kurba iti newly constructed Dawel bridge rason a naidungpar ti motorsiklo daytoy iti gutter isu’t gapuna a bimmagsak dagitoy a tallo iti kalsada.
Dagus met a naitaray dagitoy iti pagagasan ngem naideklara a dead on arrival ni Diwas bayat a dagiti dua a kaduana ket agpatpataming paylaeng iti pagagasan.
Innayon ni Torio, a naggapu dagitoy iti maysa a bar iti Arellano St. idiay Dagupan City sakbay a napasamak ti nasao nga aksidente.
