BAGUIO CITY – Nagyaman iti Bombo Radyo Baguio ti pamilia ti maaw-awagan a Super Lolo ditoy siudad ti Baguio a ni Tatay Patricio Escalante.
Daytoy ket kalpasan a nakaawat ti pamilia Escalante iti nagduduma sagut manipud iti balasang nga overseas Filipino Worker (OFW) sadiay Dubai.
Immuna iti daytoy, nakita ti OFW a ni Wendy del Rosario ti facebook post ti Bombo Radyo maipapan iti panaglaklako ni Tatay Patricio iti ay-ayam a pag-ong pag-ong.
Nagpatulong ni del Rosario kadagiti am-ammo ken kalpasan ti sumagmamano nga aldaw ket nakaur-or daytoy iti gatad nga impatulodna iti pamiliana ken dagiti nagannakna nga adda ditoy Pilipinas ti gimmatang iti nagduduma a sagut para iti pamilia Escalante ken kalpasanna ket sinapul ken sinorpresada ti pamilia ni Super Lolo.
Sigun kenni Tatay Patricio, naklaat laengen daytoy idi simmangpet iti balayda ti pamilia del Rosario nga imetda ti nagduduma a sagut a pakairamanan ti nagduduma a grocery items, bagas, masida ken bassit a gatad.
Kinuna met ni del Rosario a saan nagbalin a lapped kenkuana ti kinaaddayona ditoy Pilipinas tapno tumulong iti padana a tao.
Maipalagip nga immunan a nagyaman iti Bombo Radyo ti pamilia Escalante kalpasan a nagkita da Tatay Patricio ken ti kabsatna a ni Josefina Escalante Lobiano kalpasan ti 42 a tawen a saanda a panagkita babaen iti tulong ti Bombo Radyo.
