Agkidkiddaw ni Negros Occidental 5th District Representative Dino Yulo iti pammalawag manipod iti Sugar Regulatory Administration (SRA) seknan iti napartak a panagbaba iti presyo iti asukar iti rugi iti milling season iti 2025-2026.
Sigun kenni Yulo a maysa a third-generation sugar planter, maysa daytoy a pangta iti pagbiagan dagiti minilmilyon nga umili a mangnamnama iti mapataud iti nasao a produkto nangruna ket ti Negros Occidental ti maibilbilang a sugar bowl iti Pilipinas.
Maibasar iti datos a nairuar, agay-ayam ita iti farm gate price a ₱2,251 agingga ₱2,270 tunggal 50-kilogram bag iti asukar partikular iti La Carlota, Kabankalan, ken Sagay City.
Katukad daytoy ti 16% a panagbaba iti presyo manipod iti ₱2,671.92 kadagiti napalpalabas a crop year.
Gapu iti dayta, inyunay-unay ni Yulo a saan a rumbeng nga agbalin a nonnegotiable ti transparency ken kinunana a karbenganda ken dagiti umili a maamwan ti rason iti nasao a pakaseknan.
Nagballaag ni House Committee on Agriculture and Food Subcommittee on Sugar chairperson Yulo a kaspangarigan saan nga agtignay ti nasao nga ahensya, mapaayaban dagitoy iti congressional hearing.
Impettengna nga awanen ti nabatbati a panawen gapu ta manamnaman ti peak ti milling season kadagiti umay a bulan nu sadino, kasapulan nga agtignay dagitoy kas iti panangituding iti import restrictions wenno price subsidies tapno ma-stabilize daytoy.
