BAGUIO CITY – Kiniddaw ti lokal a konseho ti Baguio ti panagparang ti regional director ti PhilHealth – Cordillera ken dagiti panakabagi dagiti pribado a pagagasan ditoy siudad iti sumaruno a sesyon dagitoy.
Sigun kenni Councilor Joel Alangsab, partikular nga im-imbitaranda dagiti panakabagi ti Baguio Filipino-Chinese General Hospital, Notre Dame De Chartres Hospital, Pines City Doctor’s Hospital ken ti SLU Hospital of the Sacred Heart.
Kinunana a mainaig paylaeng daytoy iti pangta ti Private Hospitals Association of the Philippines, Incorporated a ‘hospital holiday’ kasaruno ti mapattapatta a P9-B nga utang ti PhilHealth iti asosasyon.
Sigun kenkuana, mangituntunda iti alarma ken panagdanag kadagiti umili ti Baguio, partikular kadagiti miembro ti PhilHealth ti nasao a pangta.
Innayonna a napateg ti akem dagiti uppat a pribado a pagagasan gaputa kadagitoy nga agpatpataming dagiti umili iti uneg ken ruar ti Baguio nangruna ta maymaysa laeng ti parapubliko a pagagasan ditoy siudad.
Inyunay-unay pay ti Alangsab a maapektaran ti serbisyo medikal a maipapaay kadagiti agkasapulan isut gapuna a nasken a maamuan ti konseho ti epekto ti nasao nga utang ti PhilHealth iti nasao nga asosasyon dagiti pribado nga opistal.
Kabayatanna, naimbitaran met ti Department of Health ken dagiti panakabagi ti Baguio General Hospital and Medical Center para iti panagdar-ay dagitoy iti dayalogo iti sesyon ti konseho inton June 4.