Ngimmato iti P3.329 bilyon ti pammastrekan ti Baguio City idi 2025—nangatngato iti 8.1% nu idilig idi napalabas a tawen—sigun iti report iti City Accounting Office.
Sigun kadagiti opisial, bunga daytoy iti nangatngato a paset iti siudad iti National Tax Allotment, kasta metten ti nasaysayaat a panangolektar iti lokal a buis.
Agtaltalinaed a pagtataudan ti pammastrekan ti NTA a dumanon iti nasurok P1.4 bilyon, a pinapigsa iti Mandanas-Garcia ruling.
Ngimmato metlaeng ti koleksyon iti lokal a buis ken pammastrekan manipod iti permit ken serbisio iti siudad, bayat a bumabbaba ti interest income gapu iti panagbalbaliw iti polisia iti pondo.
Kabayatanna, dumanon iti P2.526 bilyon ti gastos iti siudad, nu sadinno agtaltalinaed a simrek iti naituding a limitasyon iti sidong iti linteg.
Sigun iti City Accounting Office, pammaneknek daytoy iti natibker ken nasayaat a panangimanehar iti kuarta iti siudad.
