Inlawlawag ti Department of Finance (DOF) a saan a nailanad iti temporary restraining order (TRO) ti Korte Suprema a maisubli iti “state insurer” ti P60 billion a sobra a pondo ti Philippine Health Insurance Corporation (PhilHealth) a nayakar iti national treasury.
Daytoy ket sigun kenni Finance Secretary Ralph Recto babaen kenni finance committee chairperson Grace Poe, bayat ti umuna a deliberasion ti Senado iti singasing a nasional a pondo para inton 2025 kalpasan a kiniddaw ni Senate Deputy Minority Leader Risa Hontiveros a maisubli ti pondo iti Philippine Health Insurance Corporation (PhilHealth).
Idi Oktube, nangipaulog ti Korte Suprema iti temporary restraining order (TRO) a pannakayakar ti P89.9-billion excess funds ti Philippine Health Insurance Corporation (PhilHealth) iti national treasury.
Immuna nga impadamag ti PhilHealth a P60 billion ti naiyakar iti national treasury ken P29.9 billion laeng ti nabati iti nasao nga ahensia.
Sigun kenni Poe, dandani P9 billion manipud iti nayakar a pondo ti PhilHealth ti nairuar manipud iti national treasury.
Gapu iti dayta, nangipila ti umuna a petision ni Senator Aquilino “Koko” Pimentel III ken ti Philippine Medical Association kontra iti pannakaiyakar ti pondo idi Agosto.
Simmaruno ti dadduma pay nga indibidual ken grupo a kas ti 1SAMBAYAN Coalition, nga indauloan ni SC Associate Justice Antonio Carpio, and Bayan Muna chairperson Neri Colmenares ken dadduma pay a miembro idi Oktubre disi sais.
