Nangipaulog ni President Ferdinand Marcos Jr. iti Executive Order a mangsuspinder iti panagangkat kadagiti regular milled ken well-milled rice iti uneg ti 60 nga aldaw.
Pinirmaan daytoy ni Executive Secretary Lucas Bersamin.
Babaen iti Executive Order No. 93 wenno Suspending the importation of regular milled and well-milled rice for 60 days, masuportaran dagiti lokal a mannalon iti pagilian.
Sigun iti Department of Agriculture (DA), kasapulan a masuspinder ti panagangkat iti regular milled ken well-milled rice iti 60 nga aldaw tapno magatang ti produkto dagiti mannalon iti pagilian.
Maigiddan daytoy iti panag-aapit dagiti mannalon.
Mairugin intun Lunes, September 1 ti pannakasuspinder iti panagangkat ken agpatingga intun October 30, 2025.
Nupay kasta, posible a maisardeng daytoy iti kabiitan a panawen wenno mailaylayon.
Kabayatanna, nabilin ti Department of Agriculture nga idauluanda ken monitorenda ti pannakaimplementar ti nasao a pammilin.
Naibilin metlaeng iti nasao nga ahensia nga agaramid ti addang, tapno masigurado nga umdas ti suplay ti bagas iti pagilian, kabayatan ti pannakaipatungpal ti pammilin.
