BAGUIO CITY – Impaulog ti mayor ti Baguio ti Executive Order No. 145, series of 2021 a nakailanadan dagiti pagalagadan iti panakaimplementar ti Alert Level 3 iti siudad ti Baguio.
Maipalagip nga iti IATF Resolution No. 146-A ket naklasipikar iti Alert Level 3 ti Baguio City kas area for special monitoring.
Maibasar iti nasao a pammilin, amin a tattao nga adda iti masakupan ti Baguio ket nasken nga agaramat ti face mask iti amin a gundaway ken agtungpal iti physical distancing bayat a kasapulan ti panagaramat ti full coverage face shields kas kanayonan a proteksion malaksid laeng no makalapped ti face shield iti pisikal nga aktibidad ti maseknan a naka-aramat iti daytoy.
Nasken met nga agtalinaed iti babbalayda dagiti amin nga agtawen ti 17 nga agpababa ken dagiti agtawen ti 65 nga agpangato, pakairamanan dagiti immunocompromised individuals malaksid laeng no kasapulanda ti rumwar para iti napateg a gagara.
Mapalubusan met kadagiti indoor settings dagiti saan a nabakunaan wenno dagiti partially vaccinated nga agtawen ti 17 nga agpababa bayat a dagiti agtawen ti 14 nga agpababa ket nasken nga adda ti kadwada a fully vaccinated a nataengan.
Masurot ti general curfew a mangrugi iti tengngat rabii (12AM) agingga iti alas-kwatro (4:00) ti parbangon malaksid kadagiti agtatrabaho iti frontline services ken dagiti napalubusan nga aglukat iti las-ud ti naituding a curfew hours.
Maipatungpal manen ti temporaryo a panakaiparit ti panagilako ken panaginom ti arak iti masakupan ti siudad manipud iti alas-dies (10:00) ti rabii agingga iti alas-dose ti (12:00) iti kabigatanna.
Nupay kasta, agtalinaed a mabalin ti panag-inom ti arak kagiddan ti panangan kadagiti food and beverage retail establishments ken adda ti limitasyon iti maiserbi nga arak.
Maipalubos dagiti pribado a panagu-urnong ken dadduma a non-work related gatherings a maisayangkat kadagiti hotels, conference halls, convention halls ken dadduma a kapada a venue establishments la ketdi sinukimat ti City Health Services Office ti venue ken inaprobaran ti Office of the City Mayor.
Kasapulan a 30% capacity ti venue ken nasken a fully vaccinated dagiti dumar-ay.
Maipalubos pay ti in-person religious gatherings ken panagu-urnong para iti lamay ngem malimitaran iti 30% capacity iti indoor areas ken dagiti laeng fully vaccinated individuals ti mabalin a dumar-ay ken 50% capacity iti outdoor areas.
