BAGUIO CITY – Ur-urayen laengen ti lokal a gobierno ti Baguio City ti pammilin manipod iti nasyonal a gobierno para iti panakabakuna kontra iti COVID-19 dagiti agtawen ti 17 nga pababa.
Sigun kenni Mayor Benjamin Magalong, awan pay ti naaw-awatna a pammilin ken schedule para iti panagrugi ti panakabakuna dagiti ubbing.
Kinunana nga ipabiangda iti nasyonal a gobierno ti desisyon iti panagrugi iti daytoy.
Dinakamatna a mapatta-patta a dumanon iti 70,000 ti bilang dagiti agtawen iti 17 pababa ditoy siudad.
Innayonna nga iti kanito a marugian ti panagbakuna kadagiti ubbing ket maipangruna dagiti agtawen ti 12-17 ken posible a maaramat ditoy ti Pfizer wenno Moderna a brand ti COVID-19 vaccine.
Inlawlawagna met nga iti agdama ket nakatutuk ita ti lokal a gobierno ti Baguio iti panakalpas ti panagbakuna kadagiti priority groups nga A1 agingga A4.
