BAGUIO CITY – Ur-urayen ita ti Philippine Drug Enforcement Agency (PDEA) – Cordillera ti pammilin ti Central Office dagitoy para iti pannakaipila ti kaso kontra kadagiti opisial ti barangay a nairaman iti nairuar a narco-list idi napalabas a lawas.
Iti panakipatang ti Bombo Radyo kenni Atty. Joseph Frederick Calulut, information officer ti PDEA-Cordillera, kinunana a babaen iti pammilin ket dagus a maipila ti kaskenan a kaso kontra kadagiti maseknan a barangay officials.
Inlawlawagna nga iti panakaipila ti maysa a kaso ket nasken nga adda ti maiparang a nadagsen nga ebidensiya tapno agballigi daytoy.
Inaklonna met a saan a masinunuo no maipilaan iti kaso dagiti maseknan nga opisyal sakbay ti Barangay ken Sangguniang Kabataan Elections inton Mayo 14.
Dinakamatna a manipud nairuar ti nasao a narco-list ket adda metten dagiti nairaman iti listaan a nagturong iti opisinada ken nangikalintegan kadagiti bagbagida.
Maipalagip a nairaman iti narco-list ti 34 a barangay officials ditoy Cordillera a pakairamanan ti 25 sadiay Abra, lima sadiay Apayao, dua ditoy siudad ti Baguio ken saggaysa sadiay Kalinga ken Ifugao.