BAGUIO CITY – Nakumpiskar dagiti nagtipon a pwersa ti pulisya ken militar dagiti kagawaan iti panagaramid ti improvised explosive device (IED), 5 nga improvised grenades ken claymores ken nagduduma a medical supplies manipud iti uppat a nagserbi a kampo dagiti komunista a New People’s Army kadagiti kabambantayan a paset ti Bauko ken Tadian sadiay Mt. Province idi kalman.
Iti panakiyuman ti Bombo Radyo kenni Police Major Carol Lacuata, information officer ti Cordillera PNP, kinunana a resulta daytoy ti agtultuloy a clearing operations wenno panagsawar dagiti otoridad iti nakapasamakan ti engkwentro ti tropa ti gobyerno ken dagiti komunista.
Kinunana nga adun nga IEDs ti nasarakan dagiti pulis ken militar malaksid pay iti nadiskobre nga uppat a nagserbi a temporaryo a kampo ti dumanon 30 nga indibidual.
Naaramat dagiti nasao a kampo kas consolidation ken staging area dagiti komunista sakbay ti panagraut dagitoy bayat a nasarakan pay ti maysa a gukayab a nagserbi a medical evacuation a nangagasan dagiti rebelde kadagiti nasugatan a kakadwa dagitoy.
Nasarakan kadagiti kampo dagiti rebelde dagiti napanawan a taraon, wire strands, blasting caps, sim card, improvised grenades nga addaan blasting caps ken timefuze, improvised claymores, firing wire, basyo ti bala ken dadduma pay.
Nasarakan pay iti nagserbi a medivac ti nagduduma a vials, syringe, gamot, catheter, dextrose bottle, napkin, gauze pads ken adu a kapas a napumpunno ti dara.
Innayon ni Maj. Lacuata nga agtaltalinaed a naka-red alert dagiti amin nga unit ti pulisya sadiay Mt. Province para iti agtultuloy nga operasyon kontra kadagiti komunista nga NPA.
