BAGUIO CITY- Manamnama ti panag-adu ti Volume ti basura a makolektar ditoy Baguio City kagiddan ti panakaipasidong ti siudad iti Alert Level 1 ken ti panakarambak ti Panagbenga Festival.
Sigun kenni Eugene Buyucan, dadaulo ti General Services Office (GSO), nasurok iti 20-K ti napasangbay ti siudad a turista idi Pebrero 25 ken manamnama a manayunan pay daytoy iti panaglukat ti Panagbenga Festival.
Kinunana a nakasaganan met ti contingeny plan dagitoy tunggal adda ti pasamak ditoy siudad kas iti ipatpatungpald iti agdama a panag-overtime dagiti personnel ti GSO.
Imbinglayna nga agserserbi kas kanayunan nga pwersa nga agwanawan kadagiti babbarangay dagiti foreman ken sigud nga driver dagitoy tapnu maipasigurado kadagiti brgy. officials ken residente ti umno a panakidesignar dagiti basura.
Inaklonna met a saan nga maliklikan ti delay wenno panakaitantan ti koleksion dagiti basura nangruna kadagiti lugar a saan a dagus ken umno nga nai-segregate ti basura dagitoy a mangpabayag iti koleksion ti basura.
Malaksid iti dayta, imbinsana ti dakkel a porsiento ti migration ditoy siudad nu sadinno adu dagiti turista nga mapaspastrek ken kaadoan kadagitoy ket saanda nga ammo ti sistema ti basura a mangpabayag iti koleksion kadagitoy.
Gapu iti daytoy, ipalpalagipna kadagiti transient houses ken accomodation establishments ti responsibilidad dagitoy a mangipaka-ammo kadagiti turista wenno bisita iti umno a segregasyon ken panakaibelleng ti basura. CD
