BAGUIO CITY – Naka-alerto latta dagiti soldado iti amianan Luzon kagiddan ti saan a panakaideklara ti ceasefire kontra iti rebelde a grupo ita a holiday season.
Iti interview ti Bombo Radyo Baguio, kinuna ni Major Jekyll Julian Dulawan, panakangiwat ti 5th Infantry Division, Philippine Army a mangsaksakop iti Cordillera Region ken Cagayan Valley a kabinnadangda iti panag-alerto ken panagbantay kadagiti komunidad dagiti mismo nga umili ken dagiti barangay officials.
Kinunana a dakkel ita ti tulong kadakuada iti kampanya kontra kadagiti rebelde a grupo ti kooperasyon dagiti umili, nangruna iti panangireport dagitoy iti presensia dagiti rebelde nga agturturong iti lugar dagitoy.
Dinakamatna nga iti rehiyon Cordillera, adda dagiti presensia dagiti rebelde a grupo iti nagbeddengan ti Ilocos Sur ken Mountain Province; sadiay Abra ken Kalinga ken iti nagbeddengan ti Apayao ken Cagayan.
Maipalagip a tunggal anibersaryo ti CPP-NPA iti December 26 ket adda dagiti panagraut nga isaysayangkat dagiti rebelde ken kadawyan a puntirya dagitoy dagiti tropa ti gobyerno ken dagiti pasilidad dagiti construction companies ken telecommunications companies.
