BAGUIO CITY – Pagan-annaden manen ti Department of Health (DOH) – Cordillera ti publiko manipud iti dengue kagiddan ti pormal a panakaideklara ti rainy season wenno panagtutudo iti pagilian.
Sigun kenni DOH-Cordillera Entomologist III Alexander Baday, iti entero a rehion ket ti Baguio City ken Benguet ti nakailista iti kangatuan a kaso ti dengue.
Kinunana nga iti datusda ket nakailista ti Benguet ti 173 a kaso ti dengue bayat a ti Baguio City ket dumanon iti 67, sarunuen ti Kalinga a 19, Ifugao a 14, Apayao a 11, Mountain Province nga 4 ken awan ti nailista ti probinsiya ti Abra.
Pakabuklan a 298 ti kaso ti dengue a nailista iti entero a rehiyon idi Enero 1 agingga Mayo 22 a nababbaba no iti nailista idi napalabas a tawen kadagiti kapada a bulan.
Nakailista met laeng ti rehiyon iti lima a kaso ti ipupusay gapu iti dengue.
Kagiddan iti daytoy, nagpalagip ni Baday ti panagannad dagiti umili kontra iti dengue nangnangruna ita a panagtutudo manen.
