BAGUIO CITY – Inlaylayon ti Department of Education (DepEd) – Cordillera ti panag-enroll dagiti estudyante iti K-to-12 program agingga inton November 12.
Nupay kasta, inlawlawag ni DepEd-Cordillera regional director May Eclar a dagiti naladaw a nag-enroll ket nasken a maka-kamakam-da kadagiti leksion nga immunan nga inadal dagiti estudyante iti sumagmamano nga aldaw a panakaisayangkat ti ‘blended learning’.
Inlawlawagna nga iti pagalagadan ti Dep-Ed ket nasken a maatendaran dagiti estudyante ti 80% iti 205 nga aldaw iti school calendar para iti epektibo a learning assessment dagitoy.
Kinuna ni Eclar a maawatanna a marigatan dagiti learners wenno dagiti estudyante nga ag-adjust iti baro a wagas ti panagadal dagitoy.
Nupay kasta, inyunay-unayna a nasken latta a maituloy ti edukasyon iti baet ti mapaspasaran a pandemya nga ituntunda ti COVID-19.
