Naingetan ti panagmonitor dagiti barangay officials kadagiti agtutubo iti Guinzadan, Bauko, Mt. Province agsipodta mapagparparikutan ti panagbartek ken panagwalangwalang dagiti sumagmamano a menór-de-edád iti dis-oras iti rabii.
Sigun kenni, Barangay Kagawad Federico A. Catiyan, peace and order committee ti barangay Guinzadan Sur, nakailistada ti dua a kaso ti panagbartek dagiti bunggoy ti menór-de-edád, no sadinno ket dimmayo dagitoy iti kabangibang nga ili a nangitunda ti gulo iti sabali met a grupo.
Sigun pay kenkuana, in-inot dagitoy a marisrisut ti nasao a pakaseknan gapu metlaeng iti rinabii a panagronda dagiti tanodda, panangiyulogda iti curfew time ken Barangay Ordinance No. 03-24
Sagudayen daytoy a linteg ti panangiparit iti panag-inom ti arak nangruna kadagiti umili nga awanan iti permanente a panggedan.
Kabayatanna, impeksa met ni Social Welfare Officer 3 Ruby Ducao, ti Bauko Municipal Social Welfare and Development Office wenno MSWDO, a dagiti sumagmamano nga interventions, nga ipapaayda ket nakadepende metlaeng iti offense a naaramid ti maysa a maseknan.
Innayonna metlaeng a dagiti kaso a maawawatda ket maipanggep kadagiti panagtakaw, robbery, motor napping, rape ken panaglabsing kadagiti Barangay ordinance.
Impettengna metlaeng a dagitoy nga indibidual a karaman iti nasao a kaso ket adda pakainaiganna iti panaginom iti arak.
Impakaawatna metlaeng, a maysa a rason no apay a ngimmato ti kaso dagitoy iti Children Inconflict with the Law wenno CICL ket, gapu metlaeng iti epektibo a kampanya iti programada a mangipakpakaammo a silulukat ti opisina dagitoy a mang-awat ken mangipaay iti intervention kadagiti ubbing nga aglabsing iti linteg.
Sigun pay kadagiti residente, dakkel ti panagyamanda kadagiti opisyales ken kadagiti kameng iti gobyerno a tumultulong kadakuada gapu ta mariknada ti kinatalgedda iti lugar dagitoy.//Via Jomar Calingcaling, Local News Correspondent