BAGUIO CITY – Nakasaganan ti dua a production warehouses ti Department of Social Welfare and Development Office (DSWD) – Cordillera a masarakan ti regional warehouse daytoy sadiay La Trinidad, Benguet ken iti Baguio City DRRM Office.
Sigun kenni DSWD-Cordillera regional director Leo Quintilla, kadagiti warehouses a mai-repack dagiti family food packs a maiwaras kadagiti nakaro a maapektaran iti manarimaan nga Enhanced Community Quarantine gapu iti COVID-19.
Kinunana a manamnama a makapataud dagiti dua a warehouses iti 1,000 agingga 1,500 a food packs iti inaldaw.
Sigun kenkuana, iti agdama gamin ket agarup 4,000 agingga 5,000 ti food packs ti ahensia a nakasagana a mangsupusop kadagiti food packs dagiti lokal a gobyerno.
Dinakamatna pay a puntiryada a makapataud ti food packs para iti agarup 100,000 a pagtaengan iti entero a Cordillera.
Laonen ti maysa a family food pack ti innem a kilo ti bagas, walo a de lata, kape ken cereals.
Kabayatanna, silulukat ti DSWD para iti donasyon ken kadagiti kayatda ti ag-volunteer iti panakai-repack dagiti food packs kadagiti production center ti ahensia.
Kinuna ni Quintilla a dagiti interesado ket kontakenda laeng ti hotline ti DSWD-Cordillera a 0917-871-9893 ken 0919-065-5364.
