BAGUIO CITY – Inyunay-unay ti dadaulo ti Regional Internal Affairs Service ti Police Regional Office Cordillera (PROCOR) nga saanda nga itulok dagiti aramid dagiti pulis a makadadael iti integridad ken imahe ti Philippine National Police (PNP).
Iti interview ti Bombo Radyo Baguio, inaklon ni PLt.Col. Marcial Paclibon nga adda dagiti maaw-awat ken mabasbasada a report seknan iti saan a napintas nga ugali dagiti dadduma a miembro ti PNP kas iti panagbastos ken panang-bully iti asinoman a miembro ti komunidad.
Nupay kasta, impasiguradona a no mapaneknekan dagiti nasao a report ket adda ti katukad a kaso nga administratibo ken pannusa kadagiti pulis a nagaramid iti maikaniwas iti mandato dagitoy.
Kinunana a nupay ‘stressful’ wenno makapabannog unay ti trabaho ti pulis ket saan daytoy a rason tapnu bastosen wenno i-bully dagiti pulis dagiti sibilyan nangruna ta dimmalan dagitoy iti psychological screening a nangkwalipikar kadakuada iti kinapulis.
Kagiddan iti daytoy ket impanamnamana met nga adda dagiti programa ti PNP tapnu maliklikan dagiti nasao nga insidente kas iti interactive meeting, stress management program ken Police Information and Continuing Education.
Maipalagip nga itay laeng nabiit ket nagbalin a viral ti post ti maysa a frontliner seknan iti maatap a panang-bully ken panangbastos ti maysa a police officer kadagiti senior citizens a nagannakna bayat ti ilalabasda iti checkpoint sadiay Marcos Highway tapnu agpataming iti siudad ti Baguio.
Naamuan a manarimaanen ti panangimbestigar ti Baguio City Police Office iti insidente ken naipilan ti kaso nga administratibo iti Regional Internal Affairs Service ti PROCOR.
