Kidkiddawen ita dagiti residente ti Kayang Extension, Baguio City iti Barangay Officials da nga aksyonanda ti mapaspasaranda a mudflow iti nasao a lugar.
Sigun iti maysa kadagiti residente sadiay a saanen a nagpabigbig, naminadun a daras nga ada ti nagreklamo seknan iti mapaspasamak a mudflow sadiay ken naiyuman metten ti pakaseknanda kadagiti opisyales ti Barangay da ngem agingga ita maatap nga awan pulos ti aksyonda.
Inlawlawag dagiti residente sadiay a manipud nangrugi ti excavation iti ngatuen dagitoy a paset metlaeng ti nasao a barangay, dituy metten a nangrugi ti panaglaylayos iti pagtaengan dagitoy tunggal pumigsa ti tudo, saan laeng a tunggal panagbabagyo.
Imbinglay pay dagitoy a dakel a pannakasinga para kadakuada ti sitwasyonda gapu ta apektado ti trabaho ken panagturogda ta kasapulanda nga agbantay tapno saan nga umuneg ti danum iti pagtaenganda.
Inladawan pay ti maysa kadagiti residente sadiay a ‘trauma’ ti napasaranda kagidan iti epekto ti naglabas a Bagyong Maymay.
Itay metlaeng parbangon, halos dumanon iti tumeng ti layos sadiay.
Kabayatanna, sigun iti maysa pay kadagiti residente sadiay, ada ti napaspasamak a diskusyon iti nagbaetan ti kompanya/kontraktor nga agpa-excavate ken ti City Engineering Office pakairamanan dagiti dadduma a maseknan nga ahensya ngem maatap a saan a nagtuntungpal ti kompanya wenno kontraktor kadagiti katulagan wenno resulta ti diskusyon.
Gapu iti daytoy, dagiti residente nga adda iti baba ti nasao nga excavation site ti agsagsagrap ti saan a nasayaat nga epekto daytoy.
Mainaig iti dayta, mannarimaan metten nga ikagikagumaan dagiti trabahador ti nasao a proyekto ti tumulong tapno saan unay a maapektaran dagiti residente sadiay no sadino mangikabkabilda metlaengen kadagiti sandbags.
Iti agdama, al-alaen pay laeng ti Bombo Newsteam ti komento ti Barangay seknan iti nasao nga isyu. // via Bombo Noveh Organo
