BAGUIO CITY – Napimpintas no agaramat dagiti mannalon iti Benguet kadagiti alternatibo nga abono.
Inwaragawag daytoy ni Nida Organo, dadaulo ti La Trinidad Municipal Agriculture Office kasaruno ti panagngina dagiti chemical fertilizers ita a tawen.
Kinunana a nasaysayaat no agaramat metlaeng dagiti mannalon iti localized fertilizer wenno dagiti decomposed materials a mabalinda nga ilaok kadagiti chemical fertilizers wenno inayonda kadagiti chicken dung tapnu saanda unay nga aggastos kadagiti imported nga abono.
Inaklonna met a dakkel ti epekto ti panagngina dagiti chemical fertilizers iti farm inputs dagiti mannalon a nangapektar met iti production cost dagitoy.
Dinakamatna nga iti agdama ket ad-adalenda ti posibilidad a mainayon ti panangipaay ti subsidiya iti action plan dagitoy tapnu matulungan dagiti mannalon.
Immuna metten nga inlawlawag ti Department of Agriculture, partikular ti Fertilizer and Pesticide Authority a ti killaat a panagngina ti chemical fertilizers wenno imported nga abono ket intunda ti nangato a presyo dagiti petrolyo iti sangalubongan a merkado.
Impanamnamada pay nga agtignayda para iti panakarisot ti arungaing dagiti mannalon kas iti panangkitada iti mabalin a pag-angkatan ti nalaka a chemical fertiliziers malaksid iti panagaramat kadagiti micronutrient fertilizers kas alternatibo nga abono dagiti mannalon.
