BAGUIO CITY – Binilin ti Federation of Jeepney Operators and Drivers Association dagiti amin a driver ditoy siudad ti Baguio ken probinsia ti Benguet a makikaykaysa iti kampania kontra iti 2019 novel coronavirus.
Iti interbyu ti Bombo Radyo-Baguio ken ni Patricio Evangelista, presidente ti nasao a pederasion, kinunana a nabilin dagiti amin a drivers nga agaramat iti facemask ken alcohol.
Nupay kasta, kinunana a parikotda ti kinaawan ti suplay ti facemask ditoy lokalidad.
Gapu iti daytoy, kiniddaw ti pederasion ti tulong ti LTFRB tapno maaddaanda iti suplay ti facemask.
Dinakamat ni Evangelista a babaen iti tulong ti ahensia ket nakagatangda iti facemask manipud iti sabali a rehion ngem maur-uray pay ti pannakai-deliver dagitoy.
Kabayatanna, pinalagipan ni Evangelista dagiti driver ti jeep nga agbalin dagitoy a hygenic wenno nadalus kas maitunos iti pammilin ti LTFRB.
