BAGUIO CITY – Konkondenaren ti Regional Peace and Order Council (RPOC) – Cordillera ti panagaramat dagiti rebelde a New People’s Army (NPA) iti improvised explosive devices (IEDs) kabayatan ti panaglibas dagitoy sadiay Bauko ken Tadian, Mountain Province idi kanikadua.
Sigun iti chairman ti RPOC-Cordillera, inkali dagiti NPA dagiti IEDs kadagiti pagnaan sadiay a nagresulta iti ipupusay ti maysa a pulis ken panakadangran ti walo a kadwa daytoy.
Dinakamatna a barbaric wenno narungsot ti wagas dagiti NPA a makigubat kas iti panagaramat dagitoy ti IEDs.
Impettengna a saan laeng a dagiti pulis wenno militar ti mabalin a madangran gapu kadagiti nasao nga IEDs ngem ketdi uray pay dagiti umili kadagiti lugar a pakaikalkalyan dagiti nasao nga armas.
Gapu iti daytoy, supsupotaranna ti panakaituloy dagiti localized peace talks tapnu maliklikanen ti aniaman a rinnupak iti nagbaetan ti tropa ti gobyerno ken dagiti rebelde ken tapnu sumukon dagitoy.
Kabayatanna, konkondinaren met ti Regional Mobile Force Battalion – 15 ti Cordillera PNP ti panagaramat dagiti NPA iti IEDs gaputa maipawil daytoy ti International Humanitarian Law.
Nupay kasta, al-allukuyenda latta dagiti rebelde iti panagsuko dagitoy nangruna ta adda dagiti tulong manipud iti gobyerno a maawat dagitoy tapnu agbiagda a natalna kadwada ti pamilyada.
