BAGUIO CITY – Maipalpalagip kadagiti motorista a maipawil ti panagaramat kadagiti blinkers ken led light a napigsa unay ti silawna.
Iti interview ti Bombo Radyo kenni Police Executive Master Sergeant Constancio Balilis Jr. ti Regional Highway Patrol Unit – Cordillera, maipawil dagitoy gapu ta posible a mangitunda iti disgrasya.
Maibasar iti Presidential Decree 96, maipawil ti panangikabil kadagiti bambanag a nalaaw ti uni-na pakairamanan ti sirena, bells, horns ken dadduma pay.
Karaman pay ditoy ti panagaramat kadagiti nasirap a bambanag.
Kinuna met ni Executive Master Sergeant Balilis Jr. a nainget ti panangiwanawanda kadagiti motorista nga aglabsing iti nasao a linteg.
Mainaig iti daytoy, adda metlaeng dagiti pagannurotan a a masapul a suroten dagiti motorista maipapan kadagiti attachment nga ikabilda iti motor dagitoy.//Bombo Jez Lapizar
