BAGUIO CITY – Panawenen tapnu maikonsidera ti panagaramat iti drastic measures tapnu naan-anay a maparmek ti panagadu dagiti marijuana a maysa kadagiti kangrunaan a parikut ti Tinglayan, Kalinga.
Sigun kenni Tinglayan Mayor Sacrament Gumilab, mabalin a maaramat dagiti herbicides ken dadduma pay a weed killers tapnu saanen nga umado dagiti marijuana kadagiti plantation sites.
Kinunana a no agballigi ti nasao nga addang ket mangikabilda iti law enforcement unit kadagiti cleared marijuana plantations tapnu maipasigurado nga awana dagiti baro a tumaod a plantation areas nga aramiden dagiti residente sadiay.
Dinakamatna a regular ken tinawen ti marijuana eradications iti nagduduma a barangay ti Tinglayan idi panawen pay ni sigud a Presidente Fidel Ramos kas Philippine Constabulary Chief ngem agingga ita ket dagiti kapada a disso ti subject ladta ti marijuana eradication operations.
Impettengna a saan a nagkurang ti gobyerno ken dagiti otoridad a mangpalagip ken mangbagbaga kadagiti residente sadiay.
Nupay kasta, inaklonna nga adda latta dagiti umili a mangpili iti easy cash manipud iti marijuana trade nga uray pay sumagmamanon a kalugaranda ti nakemmeg ken naibalud.
